ايه اكبر مشكلة في الأدوية حاليا؟
- السعر
- لا لا انا اقصد مشكلة تانية
- امممم الأثار الجانبية ؟
مظبوط الأثار الجانبية من أكبر المشاكل الموجودة حاليا ... يعني مثلا لو جالك شوية صداع و حبيت تاخد مسكن تيجي تبص عالنشرة الداخلية تلاقي بلاااااااوي في الآثار الجانبية... فتقرر انك ترمي العلبة في الزبالة و تشرب كوباية شاي تظبط دماغك و تخليك زالفل :D
طب ايه اللي بيسبب الاثار الجانبية للدوا؟
اللي بيسبب الاثار الجانبية هو ان الدوا بيوصل لكل أجزاء الجسم مش للجزء اللي فيه مشكلة بس .. فمثلا ناخد مرض السرطان كمثال:
لو المريض عنده سرطان في الكبد مثلا, السرطان دة عبارة عن خلايا خبيثة بتتكاثر بشكل جنوني و بتكون ورم. علاج السرطان بيكون من خلال قتل الخلايا دي و هو دة اللي بيعمله العلاج الكيماوي. و لكن للأسف العلاج الكيماوي بيأثر علي كل خلايا الجسم فممكن يموت خلايا عادية و دة طبعا بيضعف الجسم فالمريض يبدأ يعاني من الإرهاق و فقر الدم و فقدان الوزن و قلة المناعة فبيتعب من أقل حاجة و طبعا زي ما كلنا عارفين شعره بيقع.
بس لسة في أمل...
طول ما في علماء بيبحثوا و بيفكروا يبقي أكيد -بإذن الله- هيبقي في حل لكل المشاكل
حل المشكلة دي بيكون باستخدام النانو تكنولوجي و النانو بوليمر اللي كنا بنتكلم عنه المرة اللي فاتت
-طب ازاي ؟
-احنا عايزين الدوا يوصل للخلايا السرطانية بس مش كدة ؟
-مظبوط..
طيب.. احنا هنحط الدوا جوا كبسول صغير جدا يمشي جوا الجسم و مايطلعش الدوا غير في مكان الورم بس....بس خد بالك لازم المادة اللي تتعمل منها الكبسول تكون مش سامة عشان ماتضرش الجسم ولازم الكبسولة تكون صغيرة جدا عشان تقدر تتحرك مع الدم بسهولة و الأهم انها تقدر تخترق الخلايا.
-طب النانو بوليمر ازاي هيعمل كدة ؟
هو بيحقق ال 3 شروط اللي فوق
-اولا : هو نانو فبالتالي هو صغير جدا
ثانيا: معظم البوليمرات مواد طبيعية و غير سامة أو مضرة (biocompatible ) فبالتالي و هو ماشي في الجسم مش هتضره و هتكون محاوطة علي الدوا فتحجب ضرره.
ثالثا: مش هتخرج الدوا غير في الورم بس
إزاي بقي؟؟؟
هي بتتعمل بأكتر من طريقة بس أنا هاقول لك علي واحدة منهم المرة دي اسمها (active targeting) , في حاجات علي سطح الخلايا اسمها مستقبلات (receptors) المستقبلات دي عاملة زي القفل لو انت معاك المفتاح بتاعه تقدر تدخل الخلية , لكن لو معاك مفتاح غيره مش هتقدر تدخل. خلايا السرطان عليها قفل أو أكتر مختلف عن الخلايا العادية , فنعمل ايه بقي؟؟
نركب علي النانو بوليمر المفتاح بتاع الخلية السرطانية فمايدخلش غير الخلية السرطانية و نتيجة لتغير البيئة داخل الخلية البوليمر هيتكسر و الدوا هيخرج يقتل الورم.
ايوة بس ايه المفتاح و ايه القفل دول؟
دي مركبات كيميائية يعني القفل دة عبارة عن مركب كيميائي علي سطح الخلية مش بيتفاعل غير مع مركب واحد أو اكتر و المركب دة هو المفتاح بتاعه و دة اللي بنحطه علي سطح البوليمر.
و زي ما احنا عارفين من المرة اللي فاتت انه من السهل اننا نركب أي مركب كيميائي علي سطح البوليمر... و دة بنسميه (surface functionalization).
و دة بيبقي شكل النانو كبسول
تعليقات
إرسال تعليق