ده الاسم اللي انا مسمياه لنفسي بس عمري ماقلته لحد, حضرتك أنا جوايا كمية عقد لا يمكن أن تتخيلها, أنا معاك ان كل واحد جواه عقده و قرفه و زهقه و أسراره بس الموضوع زايد معايا شويتين :)
أديك مثال.... اناعندي حاجات كتير أوي نفسي أعملها بس مابعملهاش , ليه؟! لأني (بعقدها ) بفضل أفكر كتيييييير كتير أوي في أي حاجة عايزة أعملها و أخوف نفسي بدون داعي و أتخيل سيناريوهات عجيبة وبتكون النتيجة في الأخر اني مابعملش حاجة !
يعني مثلا موضوع اني أبدأ blog دة أنا بفكر أعمله من 6 شهور مثلا, و قرار زي دة يبدو سهل جدا واحدة عايزة تعمل بلوج ماتقوم تعمله , لكن لأ إزاي ؟! إزاي الموضوع يعدي كدة من غير حوارات و مشاورات مع النفس :
-عايزة أعمل بلوج
- يا بنتي الناس هتقول عليكي بتقلدي فلانة اللي عملت بلوج قبلك
- طب و ايه المشكلة ما أنا هاتكلم في مواضيع تانية انا عايزة أبسط مواضيع علمية
- مواضيع علمية ايه يا بنتي دي اتعملت قبل كدة كتير و في واحد بينزل بوستس بيشرح فيها حاجات علمية و برضو هيتقال عليكي بتقلديه
- يا ستي أنا هاتكلم بأسلوبي و برؤيتي و مواضيع من اختياري
- أسلوب ايه يا أم أسلوب مش يمكن تطلعي مابتعرفيش تكتبي ولا حاجة و تفضحينا و جايز كمان تغلطي في حاجة علمية..... بصي أنا مش مستريحة للموضوع دة نبقي نعمله بعدين
.
.بعد فترة افتح الموضوع مع نفسي تاني جايز أقنعها:
-شايفة ! أهه ناس كتير عملت بلوج و متقالش عليهم بيقلدوا ولا حاجة
-تصدقي عندك حق يا ريتنا كنا عملناها من بدري بس للأسف دلوقتي خلاص ناس كتير عملته و هيتقال عليكي بتزيطي في الزيطة!
باين جدا في الحوار و أنا بعترف اني بخاف من كلام الناس و يمكن ده أكبر سبب بيعطل لي حاجات كتير.... أنا مش عايزة أفضل كدة أنا لما بشوف حد بيعمل حاجة أنا نفسي أعملها بفرح بيه جدا و بزعل جدا علي نفسي اني قاعدة حاطة ايدي علي خدي و مش بحقق أي حاجة بسبب خوفي و عقدي و حواراتي مع نفسي الكتير, أنا قررت -إن شاء الله- أعمل كل اللي نفسي فيه عشان "أنا عايزة أعمله " و "هاتبسط لو عملته "من غير تعقيدات ولا تخوفات ولا تأجيلات ولا انتظارات عشان ملاقيش الزمن بيعدي من قدامي و بيطلعلي لسانه و يقول لي: راحت عليكي يا حدقة :P
الخلاصة:
بلوج (شوية عقد فوق بعض) هدفها اني اتكلم عن مواضيع علمية بشكل بسيط و أحاول أفك عقد أي حاجة صعبة, بحيث أي حد يقدر يقرأه و يفهمه, و من وقت للتاني هابقي أفضفض بكلمتين عن عقدي الشخصية.... بدأتها عشان حسيت اني عايزة أعملها و هابقي مبسوطة بدة بغض النظر الناس رأيها ايه و هل حد أصلا هيهتم يقرأ ولا لأ ! و طبعا انا مش نمت و صحيت و قلت: ايه دة يا جماعة ان بقيت انسان تاني :-) انا لسة يهمني رأي الناس و نفسي البلوج يتابعها مليون واحد! بس دة لا يمنع ان دة مش هيكون هدفي الاساسي.
و ربنا يرزقنا الإخلاص في القول و العمل
تعليقات
إرسال تعليق