شوية ذرات فوق بعض (النانو) :

بنسمع اليومين دول كلمة "نانو تكنولوجي" و ان العلم دة هو المستقبل و انه هيسبب طفرة كبيرة في مجالات كتير في حياتنا -بإذن الله- و كلام كبير أوي ... فعشان كدة سلسلة المواضيع الجاية  -إن شاء الله - هتكون عن علوم النانو.

 

لو حضرتك حد مهتم بالعلم و التكنولوجيا بس من بعيد لبعيد كدة فهنا مكانك لأن هدف سلسلة المواضيع دي هي أنها تعرفك الموضوع ببساطة و من غير عقد ... أما بقى لو حضرتك حد العلم و التكنولوجيا هم مجالك (بتدرس علوم , صيدلة, هندسة,...) فبرضو مكانك هنا, لأنك هتعرف من هنا الخلاصة و بعد كدة هديلك لينكات لمواقع و papers أو videos  عشان لو حبيت تتعمق أكتر...

 موضوع النهاردة هيكون مقدمة بسيطة عن علوم النانو .... يعني ايه نانو ؟ و مميزاته ثم تطبيقاته ;)

نبدأ بسم الله..

­ 

يعنى ايه نانو؟

كلمة "نانو" هي اختصار و تعنى اننا قسمنا وحدة القياس علي مليار (أو ضربناها في 10 ^-9 ), يعنى احنا ممكن نقول نانومتر أو نانو ثانية أو نانونيوتن.

و لكن.... علم النانو بيهتم أكتر بدراسة المواد لما تكون في حدود النانو متر, حضرتك متخيل النانو متر دة صغير أد ايه؟ ده أصغر من المتر مليار مرة! وعشان تتخيل أكتر في تشبيه يشيع استخدامه وهو انك لو جبت شعرة و قسمتها بالعرض مية ألف مرة هتوصل للنانو متر!!!




 

المادة لما بتكون في حدود النانو بتبقي عبارة عن شوية ذرات فوق بعض ,عدد نسبيا قليل من الذرات (atoms) متجمعين مع بعض و عملولنا (Nano particle).

  طيب ... هذه ال Nano particle ايه اللي بيميزها ؟ أقول لك بيميزها كتييير, المادة لما تبقي في الحجم الصغير اوي دة خصائصها بتختلف عن حجمها الكبير!!

 يعنى المادة ممكن تكون أصلا عازلة بس لما نحولها للنانو تبقى موصلة، أو ممكن تكون خاملة في التفاعلات الكيميائية و في حدود النانو تبقى نشطة، طب مش عايزة أقول لك عالكبيرة ... المادة لونها ممكن يتغير! يعني مثلا الذهب اللي احنا سمينا اللون الذهبي علي اسمه بيبقي لونه أحمر لما بيكون Nano particles.

طبعا هذا التغير في الخصائص و وجود قوة في الخصائص قد ما تلاقيهاش غير في ال Nano particles و زيادة علي كدة الحجم الصغير جدا بيفتح الباب لتطبيقات كتير ماكنتش موجودة أو كانت موجودة و لكن باستخدام النانو تكنولوجي بتتنفذ بكفاءة أعلي بكتير.

التطبيقات :

تطبيقات النانو تكنولوجي تقريبا في كل المجالات و في حاجات اتنفذت بالفعل و موجودة دلوقتي و في حاجات لسة محتاجة دراسات أكتر و متوقع انها تبقي موجودة في المستقبل -إن شاء الله -و تحل مشاكل كتير مش لاقيينلها حل حتي الآن.

فمثلا, باستخدام النانو تكنولوجي تقدر تخلي الأدوية أكثر كفاءة و تقلل جدا من الآثار الجانبية, و مثال تاني هو تطوير الالكترونيات زي الموبايلات و الكمبيوترات... يعني اللي في الصورة دي موبايلات ..آه و الله موبايلات مش ورق طورتها شركة أجنبية باستخدام النانو تكنولوجي.

الخلاصة

علم النانو كله مفاجآت و انبهارات ... ال Nano particle عبارة عن شوية  ذرات فوق بعض و هي صحيح صغيرة جدا بس جبارة وليها تطبيقات مذهلة .. و السر ورا دة هو تغير خواص المادة لما بتبقي في حدود النانو متر.

المرات الجاية إن شاء الله هنعرف أكتر عن المواد في حجم النانو و أنواعها و أسباب التغيير في كل خاصية و التطبيقات بالتفصيل.

و ربنا يرزقنا الإخلاص في القول و العمل

لينكات أكثر عمقا:

علوم النانو:

http://tmi.utexas.edu/resources/what-is-nanoscience

النانو تكنولوجي في تطوير الموبايلات:

http://www.itpro.co.uk/611182/nanotechnology-the-future-of-mobile-phones

موقع nature  لطب النانو:

http://www.nature.com/subjects/nanomedicine

فيديو عن Nano materials  وتطبيقاته:

https://www.youtube.com/watch?v=UorI7l48ycc