النانو كربون تاني :)

ولسه بنكمل كلامنا عن النانو كربون وأشكاله... المرة اللي فاتت اتكلمنا عن الجرافين وتطبيقاته والمرة دي هنتكلم عن شكلين جداد...بس حابة الأول أفكركم بالأشكال تاني

هحاول اختصر علي قد ما أقدر إن شاء الله منعًا للرتابة والملل.

يلا نبدأ بسم الله ..

1. 1- أنابيب النانو كربون Carbon Nanotubes (CNTs)

بص كدة علي صورتها وصورة الجرافين ... لاحظت حاجة؟

عارف انت لما تجيب ورقة وتلفها وتعمل بيها شكل أسطواني؟ هو ده بالظبط اللي بيحصل عشان نحصل علي CNT طبقة جرافين بتتلف وتبقي أسطوانة قطرها في حدود النانو متر.

الCNT ممكن تبقي مقفولة أو مفتوحة زي اللي في الصورة وممكن تبقي عبارة عن طبقة واحدة أو طبقات كتير.

طبعا أنا مش محتاجة أتكلم تاني عن مميزات الجرافين ... كلها موجودة في الCNT وزيادة كمان !!

- - مميزات زيادة عن الجرافين ؟!

- - آه والله ! طب خد عندك أنت عارف إن الجرافين مادة موصلة للحرارة والكهربا،. الCNT بقا مادة موصلة وعازلة في نفس الوقت !!

- إزاي يعني ؟!

- أقول لك يا سيدي... بص كدة معايا عالصورة دي

االCNT من أحسن المواد الموصلة (زي الجرافين ) في اتجاه السهم الأزرق... أما في اتجاه السهم الأحمر فهي عازلة تماما... بمعني ان الالكترونات تقدر تتحرك بسهولة جدا في اتجاه السهم الأزرق وماتقدرش تتحرك في اتجاه السهم الأحمر. تفتكر ليييه؟

دة بسبب انها مجوفة يعني في نصها في هواء وهو مادة عازلة، فلما الالكترونات تحاول تتحرك في اتجاه السهم الأحمر هتقابل الهوا ومش هتقدر تتحرك.

طيب هل ليها مميزات تانية؟

الشكل الأسطواني المجوف ده بيخليها شبه الكبسولة و نقدر نخزن جواها أي مادة تانية...

-فمثلا نقدر نحط جواها دواء للكانسر مثلا وبطريقة ما نخليها توصل بس للورم وبعد كدة تخرج الدوا اللي جواها وتقتل الخلايا الخبيثة دي .

. Carbon dot

معناها الحرفي نقطة الكربون ودة لأنها صغيرة جدا وواخدة شكل دائري فبقت شبه النقطة... في العموم أي حاجة حجمها بيبقي أصغر من 10 نانو متر بنسميها quantum dot وغالبا بنلاقي ان الdots دي صفاتها مختلفة عن الحجم الأكبر شوية يعني لو نفس المادة عند 10 نانومتر و عند 100 نانومتر بيبقي كل حجم ليه صفاته!

إن شاء الله هنبقي نتكلم عن الQuantum dots بالتفصيل في موضوع منفصل.