شوية جزيئات جنب بعض!

النهاردة بنتكلم عن تاني نوع من أنواع مواد النانو و هي مواد النانو البوليمرية (Polymeric Nano particles), و النوع دة بالذات نوع جااامد جدا و من أكتر الأنواع المستخدمة في الطب و ليها تطبيقات كتير و....

-          ثواني ثواني , انتي مالك داخلة جامد كدة مش لما نعرف الأول يعني ايه بوليمرية دي ؟؟

-          تصدق عندك حق ..."بوليمرية دي يعني معمولة من بوليمر سمعت عنه قبل كدة؟

-          أنا آخر مرة سمعت الكلمة دي كان يا في تانية ثانوي يا في تالتة ثانوي  في الرينج دة

 

 

طب يا سيدي أنا هافكرك...البوليمر دة عبارة عن (شوية جزيئات جنب بعض) جزيئات صغيرة  قرروا انهم يتحدوا مع بعض و يعملوا جزيء كبيير (macromolecule). و لأن الاتحاد قوة البوليمرات ليها كمية أشكال و خواص و تطبيقات لا حصر لها و عشان كدة بقي في علم مستقل بذاته للبوليمرات.

 

البوليمر ممكن يكون مكون من جزيئات شبه بعض أو لأ ...ممكن يكون متفرع أو لأ ...و ممكن يكون شكل شبه الشبكة و هذا التنوع هو اللي بينتج الصفات المختلفة و التطبيقات المختلفة.

 

 

 

احنا حياتنا كلها بوليمرات ... البلاستيك دة بوليمر, الأكياس النايلون بوليمر, الدهانات بوليمر, إطارات عجل العربيات بوليمر, الهدوم بوليمر, الخيط الطبي بوليمر, السرنجة بوليمر,.... (دور و قول لنا ايه تاني؟ )

لا و لسة .. العلماء توصلوا لبوليمرات بتصلح نفسها (self-healing materials) يعني مثلا لو حصل فيها قطع أو خدش بيتصلح.. أو بوليمر بيغير شكله حسب الظروف المحيطة بيه زي درجة الحرارة مثلا... شوف الفيديوهات دي :

https://www.youtube.com/watch?v=1i3yoK0C9Ag

https://www.youtube.com/watch?v=50zu5HSdlLc

 

لما بقي لما البوليمر يبقي نانو بيبقي ليه تطبيقات أكتر و أكتر بس أهمها في الطب و لكن قبل ما نقول ازاي و ليه عايزين ندخل جوا البوليمر دة أكتر و نستكشفه كويس.

مش أي مجموعة من الجزيئات يقدروا بكونوا بوليمر ..البوليمر -غالبا- بيبقي أساسه مادة الكربون و معاها شوية ذرات تانية

-كربون تاااني ؟

-اه شفت بنلف نلف و برضو نرجع للكربون

-طب اشمعنا الكربون ؟

كل ذرة و ليها عدد معين من الذرات اللي تقدر ترتبط بيهم , ذرة الكربون تقدر ترتبط بذرتين أو تلاتة أو أربعة فمثلا بص عالصورة دي 

 

 

دة بوليمر عبارة عن كربون و هيدروجين انت ممكن مثلا تشيل واحدة من ذرات الهيدروجين و تحط مكانها أي ذرة تناية أو جزيء تاني أو بوليمر تاني كبير و ممكن تشيلها أو متحطش حاجة خالص !. و ممكن تشيل أتنين أو أكتر و تحط مكانهم حاجتين مختلفتين أو تجط نفس الحاجة أو ...أو ...اختيارات كتير ممكن تعملها و علي حسب الاختيار اللي هتختاره دة هيديك صفات جديدة للبوليمر و يديلك تطبيقات أكتر

طبعا محتاجين مثال علي كدة, أوضح مثال هو استخدام البوليمرات و بالذات النانو في الطب و لكن دة هيكون موضوع الأسبوع الجاي إن شاء الله.

و ربنا يرزقنا الإخلاص في القول و العمل ...

الخلاصة 

الوليمر عبارة عن شوية جزيئات جمب بعض و علي حسب نوع الجزيئات أو طريقة ارتباطهم بينتج أشكال و صفات و تطبيقات كتير جدا موجودة كتير جدا في حياتنا و حاجات لسة هتبقي موجودة في المستقبل إن شاء الله.

لينكات أكثر عمقا:

شابتر كتاب عن البوليمر

http://www.uwosh.edu/faculty_staff/mihalick/materials/Chapter5.pdf

self-healing polymers

http://www.pitt.edu/~btc26/trends.html

shape memory polymers

http://www.crgrp.com/rd-center/shape-memory-polymers